O Colexio de Arquitectos de Galicia (COAG) propuxo ao Concello de Lugo un concurso de ideas para un proxecto de urbanización do espazo que ocupaban as torres do Garañón, aínda que de momento non sexan terreos públicos.

Deste xeito, o COAG solicita unha reunión coa alcaldesa, Lara Méndez, para exporlle esta posible colaboración e abrir o debate público sobre a rehabilitación e posta en valor desta zona.

Nun comunicado, expón que a experiencia do Colexio de Arquitectos nestes procedementos fai que poida colaborar na asesoría e na redacción de pregos administrativos e técnicos, na difusión da convocatoria entre colexios de arquitectos de España e na organización do xurado, entre outras cuestións.

Lembra que os concursos de ideas son un procedemento aplicado en moitas das mellores actuacións arquitectónicas e urbanísticas recoñecidas, supón a apertura a talentos descoñecidos polo promotor e concorren profesionais cualificados.