A Policía Local de Lugo tramitou denuncia a un local de hostalaría da capital luguesa por seguir aberto fóra de horario pola normativa establecida pola pandemia da Covid-19.
Segundo informou a Policía Local, no marco dun control para velar polo cumprimento das medidas Covid, ás 00,45 horas da noite deste mércores axentes de Policía de Barrio comprobaron que un local de hostalaría da rúa Luís Seoane estaba aberto ao público e atendía á clientela. Por iso, indican as mesmas fontes municipais, o local foi denunciado por infracción á Lei de Saúde de Galicia.
Por outra banda, durante a tarde do mércores pasado unha unidade de Policía de Barrio trasladouse á rúa Pena do Rei onde, segundo información telefónica, había un establecemento público sen pechar e sen que se observase a ningunha persoa no interior.
Unha vez no lugar, axentes constataron que non había ninguén e procederon a contactar co titular do establecemento quen acudiu para comprobar que non faltaba nada no local. Segundo manifestou o dono, posiblemente tratouse do “descoido dalgún traballador” á hora de peche, indicaron as mesmas fontes.
FESTA
Doutra banda, ás 23,35 horas deste pasado mércores axentes de Policía de Barrio desprazáronse a un domicilio de Camiño Real onde se realizaba unha festa con música que molestaba aos veciños.
Os policías advertiron aos moradores das molestas que causaban, tras o que apagaron a música de inmediato”, destacou a Policía Local, e abandonaron a vivenda cinco persoas. Foron denunciados por infracción á ordenación de Protección Ambiental.
