Todo o persoal do primeiro equipo do Club Deportivo Lugo, así como o resto de persoas do corpo técnico e os seus auxiliares que participaron este sábado nun cribado, deberán gardar corentena despois de detectarse un brote con 23 positivos por covid-19 en total.
Dos casos descubertos, 15 son xogadores do primeiro conxunto, outros sete correspóndense co ‘staff’ técnico e outro é un auxiliar, segundo informa na tarde deste domingo nun comunicado o CD Lugo.
Por mor dos resultados deste cribado, a Consellería de Sanidade decretou o confinamento domiciliario tamén para as 27 persoas que deron negativo no test. Ademais, realizarase un novo cribado este luns no Hospital Universitario Lucus Augusti (HULA).
Tal e como indicou o club nun primeiro comunicado deste domingo, as autoridades sanitarias pertinentes “xa están a aplicar o protocolo” disposto a tal fin para “tratar de controlar a situación acaecida”. Trátase de “un caso extremadamente delicado”, dado que a aplicación “continuada e rigorosa” dos protocolos permitiron en pasadas temporais que o CD Lugo fora “o club con menos contaxios”.
Por iso, o comunicado do conxunto lucense deduce que, a pesar de “os múltiples esforzos realizados”, este brote prodúcese dado o “elevado poder de contaxio da variante”. Así, pide “o máximo rigor por parte de todos”.
Dada esta situación, o CD Lugo decidiu suspender o adestramento que tiña programado para a tarde deste mesmo domingo e está no aire o partido contra a Unión Deportiva Almería previsto para este luns.
