Os maiores de Lugo poden gozar da cidade a través de roteiros guiados. É unha iniciativa do goberno de Lara Méndez, dende a área de Benestar, Inclusión e Terceira Idade, denominada ‘Lugo móvese cos maiores’ e que está incluída no programa municipal de animación sociocultural, onde se están a levar a cabo roteiros guiados, tanto pola zona rural como pola cidade.

A edil Olga López lembrou que “as rutas guiadas terán lugar todos os venres cada 15 días, no caso dos roteiros polo rural o punto de partida será a Praza Bretaña e na cidade as saídas estan contempladas desde a Praza Maior, sempre baixo as restriccións sanitarias en vigor en cada momento”.  O vindeiro roteiro polo rural será o venres 23 de xullo polo Camiño Primitivo (Lugo-San Román da Retorta) e xa en agosto están programados para o 6 de agosto e o 20, polo Camiño Primitivo (Castroverde-Lugo) e O Vello Lugo Agrario, respectivamente.

‘Lugo móvese cos maiores’ é unha iniciativa contemplada no programa municipal de animación sociocultural, que repite este verán “tras o éxito de participación nos meses de abril e maio”, que reuniu a máis de 800 persoas nas diferentes actividades que se puxeron en marcha pola cidade para a poboación maior de 65 anos.