O pleno do Concello de Lugo debaterá este mes de xuño a proposta de derriba das Torres do Garañón elaborada polo goberno local que encabeza Lara Méndez e que contempla a conversión da parcela nunha zona verde que se uniría ao parque de Rosalía.
Antes, este mércores, a área de Sustentabilidade Urbana da administración local levará a xunta de goberno o cambio nos usos da parcela onde se asintan as torres para declarala de edificabilidade cero.
Este paso, segundo explicou a alcaldesa este martes, supón a solución “máis adecuada” para encaixar o acordo plenario para a modificación puntual do plan urbanísitico municipal. Así as cousas, o goberno prevé levar á sesión ordinaria deste mes de xuño a súa proposta de modificación de crédito para proceder á derriba do Garañón, que tería un custo de 970.000 euros.
“Trátase de dar cumprimento a un ditame xudicial que anula a licenza outorgada no seu día para permitir a construción, pero tamén de acatar a vontade da corporación”, incidiu Lara Méndez, en referencia ao acordo plenario que apelaba a que terminar co inacabado edificio tivese o “menor impacto posible” sobre as arcas municipais.
Para a rexedora, o “fin” das torres do Garañón supón terminar “non só” cunha estrutura “que afea a paisaxe nun das contornas máis fermosas e emblemáticos da cidade”, senón tamén acabar “con todo o que simbolizan”.
