O Tenente de Alcalde e responsábel da área de Mobilidade de Lugo, Rubén Arroxo, acusou ao PP de tentar polemizar co modelo de transporte público, tras as críticas deste partido e lembrou que os populares apoiaron este modelo de transporte na Mesa de Transporte Público xunto co resto de grupos da corporación.
O proxecto está composto por 6 grandes liñas que conectan o eixo Norte-Sur da cidade, a zona onde se atopa a maior parte da veciñanza de Lugo, e que terá unha frecuencia de 10 minutos. Os distintos barrios melloran as frecuencias de conexión co centro da cidade, pasando da hora entre cada volta que hai actualmente a 30 minutos a partir do vindeiro día 2.
“O novo modelo optimiza ao máximo os quilómetros contemplados no contrato de transporte público co que contamos na actualidade”, dixo Arroxo nun comunicado no que sinalou que, para engadir un novo percorrido, habería que suprimir a conexión con outra zona da cidade.
“O PP pide aumentar as conexións nun punto da cidade, e terá que explicar na Mesa de Transporte a que zona se lle ten que retirar”, afirmou Rubén Arroxo, que lembrou que “as novas liñas conectarán con maiores frecuencias e mellores percorridos todas as zonas da cidade”.