A alcaldesa de Lugo, Lara Méndez, e o presidente da Confederación Hidrográfica Miño-Sil, José Antonio Quiroga, asinaron este venres o convenio do Plan Paradai, que permitirá atallar as crecidas do río Rato.

Este documento recolle as actuacións necesarias para, segundo explicou a rexedora, “seguir avanzando no desenvolvemento dos barrios das Gándaras e Paradai, 21 anos despois de comprometer coa Xunta de Galicia a súa unión”.

Lara Méndez indicou que o acordo terá por obxecto a execución dos estudos, proxectos e obras que permitan reducir o risco de inundación durante as crecidas producidas polo río Intre na contorna da glorieta da rúa Serra de Meira.

Así mesmo, lembrou que as actuacións que recolle abarcan a redacción dun proxecto que permita mellorar a capacidade de desaugadoiro do tramo fluvial canalizado nese enclave concreto, así como un estudo sobre a conveniencia de actuar da mesma maneira no tramo de río canalizado augas abaixo da glorieta.

O investimento total para a execución das obras estímase en 650.000 euros, dos que a CHMS achegará 487.500 euros, o que supón unha porcentaxe do 75% do total, e o Concello de Lugo achegará o 25% restante (162.500 euros).

A Confederación Hidrográfica afrontará, con ese diñeiro, o custo de execución dos traballos, dirección e vixilancia dos mesmos, ademais dos gastos correspondentes ás medidas de seguridade e saúde estimados,

Pola súa banda, será responsabilidade municipal o mantemento e conservación das obras obxecto do acordo e a aprobación do proxecto construtivo, redactado pola Confederación.

Para o desenvolvemento desta colaboración e ata o momento da entrega das actuacións, establecerase unha Comisión Mixta que estará composta por un representante de cada unha das partes e que terá, entre os seus labores, o seguimento, vixilancia e control da execución do Convenio e dos compromisos adquiridos ao seu amparo, así como a solución das dúbidas que poidan xurdir.