O subcomité clínico decidiu rebaixar as medidas de restrición na cidade de Lugo, que pasa do nivel máximo ao medio, ao igual ca outras áreas galegas. Malia que se mantén o peche perimetral, a hostalaría poderá ampliar a actividade.

Así o acordou o subcomité nunha reunión mantida este venres 11 de decembro para valorar a situación epidemiolóxica. O conselleiro de Sanidade, Julio García Comesaña, destacaba unha menor incidencia en Galicia, tendencia que tamén se ve en Lugo, polo que as restricións serán menores.

Así, no concello de Lugo os establecementos hostaleiros poderán abrir ao 40% da súa capacidade no interior e ao 50% nas terrazas ata as 23:00 horas. Ademais, permítense agrupacións de ata seis persoas non conviventes.

CAMBIOS NO RESTO DE GALICIA

Sanidade tamén alivia as medidas na cidade de Pontevedra e a súa área, así como no Porriño e Narón, que quedan no nivel medio-alto de restricións.

Así mesmo, dada a evolución positiva dos parámetros, os municipios de Silleda, Ribadavia, A Laracha, Cabana de Bergantiños, Malpica, Vilanova e Xinzo pasan ao nivel básico. Levántanse as restricións á mobilidade e a hostalaría poderá abrir ao 50% en interiores e 75% en terrazas.

Polo contrario, Sanidade pide un “esforzo adicional” en Sarreaus, A Rúa, Camariñas, Zas, Tomiño e O Rosal. Todos eles concellos que soben de nivel.