A Concellería de Benestar, Inclusión e Maiores do Concello de Lugo reforzará a asistencia que presta habitualmente a persoas “vulnerables” a través do Fogar do Transeúnte, para “poder atender a un maior número” de usuarios ante “a situación de crise sanitaria provocada polo coronavirus”.
O goberno local informou de que “o obxectivo” é que, a pesar das medidas de confinamento decretadas para frear a propagación do virus, “ningún dos usuarios habituais” ou de “novas” persoas que demanden este servizo “queden sen comer”. Para iso, estableceranse quendas de atención, co que se procurará que non haxa máis de “vinte persoas” xuntas en cada un deles.
Ademais, tamén se busca, con estas medidas, “reter aquelas persoas sen recursos que non teñen onde pernoitar”, para que “queden no centro e non transiten polas rúas”, dixo a concelleira de Benestar, Olga López. “Trátase de evitar así un posible contaxio, porque moitas delas son colectivos de risco”, engadiu, de modo que tamén “se habilitarán novos espazos con camas a medida que vaia xurdindo a demanda”.
