EFE.- O sindicato policial Jupol presentará unha reclamación ante a Dirección Xeral da Policía e o Ministerio de Interior para evitar que as salas do 091 desaparezan das comisarías de Lugo e Ourense, logo de expoñerse a posibilidade de centralizalas na Coruña.
O responsable de Jupol na provincia de Lugo, Daniel Sinde, asegurou que esta medida non responde a un interese por mellorar o servizo que se lle presta aos cidadáns, senón ao desexo de “evitar gastos”. Nese sentido, precisou que nas comisarías de Ourense e de Lugo “falta xente”, pero “como non queren destinar máis funcionarios” a eses lugares, ao centralizar o servizo do 091 na Coruña xa “poden dicir que uns cuantos axentes quedan libres para saír de patrulla á rúa”.
Desde o seu punto de vista, estes “recortes” farán “menos operativo” tal servizo de atención cidadá. Para Sinde, é máis eficiente manter as salas do 091 nas comisarías de Lugo e Ourense porque os funcionarios “coñecen a cidade“, así que a súa resposta será máis rápida e precisa.
CONTRA O VETO Á ILP
Por outra banda, policías nacionais e gardas civís, convocados pola Asociación Jusapol, concentráronse esta mañá ante a Subdelegación do Goberno en Lugo para protestar “polo veto do PSOE no Congreso á ILP de Jusapol” para conseguir a “equiparación salarial das Forzas e Corpos de Seguridade do Estado coas policías autonómicas”.
