O grupo municipal do Partido Popular en Lugo tacha de “ignorante e mentireiro” a Gonzalo Caballero, candidato socialista á Xunta, logo de que este asegurara na súa visita a Lugo que Feijóo non fixera nada pola cidade. Os populares cualifican as declaracións do líder do PSdeG como “unha sarta de mentiras” que evidencian o “nerviosismo” dun Caballero “non as ten todas consigo” de cara ao 5-A.
O voceiro popular, Ramón Carballo, manifestou que “dicir que Feijóo non fixo nada por Lugo só pode significar que [Caballero] é un ignorante ou que mente de forma maliciosa para sacar un rédito político”. Carballo referíase ás declaracións que fixo onte Gonzalo Caballero na cidade, onde criticou que o presidente da Xunta non inaugurara ningunha obra de relevancia nos seus once anos de goberno.
“DEBERES” PARA LARA MÉNDEZ
Mentres que o socialista presumía de compromiso con Lugo fronte aos “deberes que non fixo Feijóo”, Ramón Carballo recoméndalle que se centre en poñerlle eses deberes á alcaldesa. “Leva anos bloqueando proxectos de futuro para Lugo e investimentos millonarios da Xunta”, sostivo.
De feito, o voceiro do PP recriminoulle a Lara Méndez a súa “cara dura por negar a realidade”, en alusión ás actuacións da Xunta en Lugo. “Hai cuestións que son interpretables, pero cando se trata de algo evidente non se pode dicir que non existe”, asegurou. E, coma quen quere probar verdadeiro o que di, Carballo enumerou algunhas das inauguracións nas que estivo Feijóo. Entre outras, citou a apertura do HULA, o corredor Nadela-Sarria, a remodelación do barrio da Residencia ou a ponte de Paradai.
