O CEIP Casás, a Asociación de Nais e Pais deste colexio e o Club Deportivo Casás puxeron en marcha unha campaña de recadación de fondos co gallo do Día Internacional contra o Cancro Infantil, celebrado o pasado 15 de febreiro. A través de distintas actividades, conseguiron xuntar arredor de 3.000 euros que destinarán á asociación ‘Somos Unidos polo Cancro’.
O alumnado do centro argallou un mercado solidario con produtos fabricados polos propios nenos e nenas: dende pulseiras ata soportes para móbiles elaborados cunha impresora 3D. As familias tamén se implicaron no asunto e doaron xoguetes que logo foron postos á venda.
Parte dos beneficios obtivéronse a través dun photocall preparado para a ocasión e cuxos protagonistas foron personaxes infantís como Mickey Mouse, o pato Donald ou Pelón.
OS RESULTADOS
Concretamente, o CEIP Casás recadou 2.551’54 euros, aos que hai que sumar os 261’90 conseguidos polo Club Deportivo Casás e os 283 euros que xuntou a ANPA. A cifra total ascende a 3.096’44 euros, que irán parar á citada asociación lucense contra o cancro.
