O vindeiro 15 de febreiro conmemórase o Día Internacional contra o Cancro Infantil. O CEIP Casás de Lugo quixo poñer un grao de area e axudar no proceso de concienciación e sensibilización ante esta enfermidade. Así pois, teñen previstas varias actividades en colaboración coa Asociación Somos Unidos por el Cáncer, colectivo ao que destinarán os beneficios recadados nun mercado solidario ou no photocall disposto para a ocasión.
Alumnas e alumnos do CEIP Casás porán á venda diferentes produtos que elaboraron eles mesmos. No mercado, que terá lugar este 14 de febreiro, poderán adquirirse pulseiras confeccionadas a man ou mesmo chaveiros e soportes para teléfonos móbiles fabricados cunha impresora 3D. O diñeiro recadado irá parar, integramente, a Somos.
Ademais, nesa feira infantil solidaria tamén se venderán xoguetes que doaron as familias. En caso de que quede algún de sobra trala xornada do venres, será entregado á Unidade de Hospitalización Pediátrica do Hospital Lucus Augusti (HULA).
O horario de atención ao público estará repartido en tres quendas: de 10:00 a 11:00h, de 14:00 a 15:00 e, finalmente, de 17:00 a 21:00h.
MICKEY, DONALD E PELÓN TAMÉN BOTAN UNHA MAN
Amais do mercado, o CEIP Casás tamén organiza un taller de pulseiras solidarias, distintas charlas para o alumnado de Primaria e un flashmob. Outra das propostas estrela ten moito que ver cos debuxos animados e a fotografía. Mickey Mouse, o pato Donald ou Pelón pasearán pola escola por se algún neno ou nena quere ter unha foto cunha destas personaxes infantís tan famosas. Ao mercar a imaxe, estarase realizando un donativo de tres euros para a Asociación Somos.
A directora do centro, Verónica Eiravella, asegura que xa se recadaron uns 700 euros durante os días previos ao mercado, debido a que houbo persoas que adiantaron os cartos para que se puidera conseguir o material do photocall. “E aínda falta o día forte”, di, esperanzada.
