A Igrexa Ortodoxa en Galicia podería ter un número de seguidores arredor dos 800 ou 900, se se fai caso aos datos que ofrece o IGE sobre inmigrantes procedentes de países onde esta fe é maioritaria. Mais a enquisa só rexistra a Rusia, Ucrania, Rumanía e Bulgaria como lugares de procedencia de potenciais comunidades ortodoxas. Tamén habería que ter en conta galegos e galegas que se converteran a esta fe, outras nacionalidades, como os gregos, e coñecer o número real de practicantes que asisten ás eucaristías. En Galicia existen tres parroquias, a máis recente delas é a de Lugo que atende sobre todo a comunidade romanesa.
Radu Iacob é sacerdote na parroquia ortodoxa de Lugo. Segundo explica, a eucaristía ou misa ortodoxa non ten grandes diferenzas con respecto á católica romana. “As partes principais son as mesmas, veñen dos primeiros ritos cristianos, o caso é que todo está cantado e a misa é máis longa, unha hora e media”.
As igrexas ortodoxas son igrexas nacionais: non hai unha cabeza universal como no caso do catolicismo co Papa ou bispo de Roma. “Cada país ten o seu patriarca e, polo tanto, o idioma da misa é o do país normalmente”. Tamén hai igrexas ortodoxas en linguas como o árabe, sobre todo situadas en Oriente Medio.
CELIBATO VOLUNTARIO
Os curas ortodoxos poden estar casados, mais deben estar casados antes de seren ordenados sacerdotes. Radu, por exemplo, ten muller e tres fillos. Coñeceu a súa muller cando xa vivía en España nunha igrexa ortodoxa romanesa. As familias xa se coñecían e logo casaron. O bispo que dirixía a diócese onde estaba Radu faloulle de ordenarse. “A miña muller e eu pensámolo durante unha semana e finalmente ela deume o seu apoio”.
O papel da muller é moi importante para o sacerdote. “Algúns din que é o 50% do traballo parroquial é cousa da muller”, di Radu. “Ás veces hai xente que se sorprende de ver un cura con sotana acompañado dunha muller e nenos”.
AS MISAS EN LUGO
Segundo este sacerdote en Galicia había 9.000 romaneses rexistrados, aínda que el mesmo admite descoñecer o número real de persoas que poderían estar dentro da súa demarcación. “A media de persoas que acoden á misa anda sobre as 30 ou corenta persoas”.
Ás veces acoden persoas doutros países. “Recibimos a un búlgaro e hai pouco bautizamos a filla dunha parella xeorxiana. Sei que hai máis, como rusos ou ucranios. É posible que non veñan ao pensaren que só oficio en romanés”. Radu engade que tamén fai celebracións en español para as persoas doutras nacionalidades.
Podes ler a información completa no Galicia Confidencial.
