A subdelegada do Goberno, Isabel Rodríguez, anunciou hoxe que a Tesourería Xeral da Seguridade Social pechará unha das súas oficinas en Lugo para centralizar todos os seus servizos na sede da Dirección Provincial, no número 26 da Rolda Músico Xosé Castiñeira.
A subdelegada indicou que, desta maneira, a Seguridade Social busca “aumentar a eficiencia e operatividade” nas súas instalacións de Lugo, así como mellorar “o servizo prestado aos cidadáns”.
Así pois, este venres 31 de xaneiro, pecha as súas portas a oficina situada na Avenida Ramón Ferreiro, onde prestaban o seu servizo desde hai anos a Administración nº1 e a Unidade de Recadación Executiva nº1 de Lugo.
Ambas unidades estarán operativas a partir do vindeiro luns 3 de febreiro na sede provincial, onde xa funcionan o resto de oficinas de atención ao público. Dada a proximidade destes dous edificios, “non se considera lóxica manter as dúas abertas”, explicou a subdelegada do Goberno.
