O avogado da maxistrada Pilar de Lara, Agustín Azparren, asegurou que “despois de Reis” coñecerase se a maxistrada lucense ten que cumprir a sanción de sete meses e un día que lle impuxo o Consello Xeral do Poder Xudicial (CGPJ) e que carrexa a perda de destino.

A titular de Xulgado de Instrución número uno de Lugo recorreu ante o Tribunal Supremo esta sanción por dilacións indebidas nas macrocausas que investiga. Azparren sinala que a resolución sobre a “medida cautelar” adoita tardar “un mes aproximadamente” polo que calcula que “sería para despois de Reis, en xaneiro, cando se resolvería sobre se ten que cumprir a sanción e deixar, por tanto, o xulgado, ou se o Tribunal Supremo concede a suspensión e pode continuar ata que se decida sobre o recurso principal”. Este último extremo, segundo indicou, “tardaría como mínimo un ano”.

No caso do castigo a Pilar de Lara leva aparellado perdida de destino, ademais da suspensión de emprego e soldo durante sete meses e un día. Con todo, neste caso, considera que sería “moi difícil de reverter” se a xuíza ten que pedir o traslado fóra, “que habitualmente é a bastante distancia”.

“Aquí non casa con revertelo cunha indemnización posto que iso supón que perdeu o destino, que tivo que trasladar o seu domicilio coa afectación á vida familiar e á conciliación da vida familiar. Esta é a característica desta sanción, porque leva aparellada perda de destino, con respecto a outras (só suspensión de emprego e soldo) en que o Supremo nunca concede a suspensión”, advertiu.