A Garda Civil interceptou un condutor que circulaba a 187 quilómetros por hora nunha furgoneta que ten limitada a velocidade a 90 no municipio de Guntín.

Segundo informou a Garda Civil, ás 12,54 horas deste pasado xoves foi detectado o condutor no quilómetro 18,400 da autovía A-54 (Lugo-Santiago), sentido crecente, no termo municipal de Guntín.

As mesmas fontes concretaron que se trata dun delito contra a seguridade viaria ao ser detectada unha furgoneta que circulaba a 187 km/h, a pesar de estar limitada a velocidade a 90 Km/h en virtude da súa categoría.

Por iso, indicaron as mesmas fontes, procedeuse á investigación do seu condutor, un cidadán de 24 anos de idade sen domicilio en España, que será posto a disposición xudicial.