Friol cancela a Feira do Queixo e Pan de Ousá por “responsabilidade” ante o coronavirus

O alcalde, José Ángel Santos, di sentirse "afectado", pero entende que é o máis lóxico para evitar posibles contaxios que poderían darse nun evento que esperaba reunir unhas 20.000 persoas.

O Concello de Friol cancela a Feira do Queixo e Pan de Ousá ante a evolución do coronavirus.

O Concello de Friol informou de que suspende a XXVIII Feira do Queixo e do Pan de Ousá ante a evolución da crise do coronavirus. Esta decisión foi tomada tras manter unha reunión con responsables de sanidade para actuar en aras da “responsabilidade” para previr posibles contaxios.

O goberno local estimaba que o evento reuniría máis de vinte mil persoas o vindeiro 22 de marzo en Friol, polo que “non sería prudente nin responsable permitir a súa celebración”, tal como explicaban nun comunicado dende o Concello.

O propio rexedor municipal, José Ángel Santos, recoñeceu sentirse “tremendamente afectado” polo cambio de plans, pero asegurou que “non se perdoaría” a si mesmo que ao día seguinte da Feira algunha das persoas dese positivo no virus. Por iso, apela a seguir as recomendacións sanitarias e a actuar con sentido común.

DEIXAR UN COMENTARIO

Please enter your comment!
Please enter your name here