A veciñanza de Castroverde prepáralle unha homenaxe a Enriqueta Otero, guerrilleira antifranquista nada na parroquia de Miranda aló polo ano 1910. O vindeiro 8 de marzo, Día Internacional da Muller, están previstas actividades durante toda a mañá para honrar a memoria da Ribona.
Diferentes entidades, asociacións e colectivos de Castroverde colaborarán no acto de homenaxe, que comezará ás 10.30 horas na praza do Concello. Nese recoñecemento á mestra republicana, terán cabida expresións artísticas da man de Paco Pestana e Xosé Darriba. Pestana levará ao CPIP de Castroverde a súa exposición ‘Mírame: enferma de amor e prosa’, inspirada na propia Enriqueta Otero; mentres que Darriba presentará unha escultura na honra da guerrilleira.
Ademais, prevese unha visita á escola de Cellán para lembrar o ideario educativo defendido pola Ribona, que puxera en marcha unha “universidade popular” co seu proxecto O Carriño. Máis tarde, as persoas participantes desprazaranse ata Miranda para coñecer a casa na que morou Enriqueta Otero. Haberá, así mesmo, unha ofrenda floral a carón da súa sepultura.
Neste acto de homenaxe colaboran o propio Concello de Castroverde, o Centro de Artesanía e Deseño de Lugo, o CPI Castroverde, Amigos do Patrimonio de Castroverde, A Chave das Noces, A.C. O Forno da Vella, e bandas de música como Trasdalomba ou Zuncurrundullo. Tamén están implicados particulares como Paco Pestana, Ricardo Polín, Xosé Darriba, Xulio Xiz ou Xesús Mato.
Trinta anos sen Enriqueta Otero, a guerrilleira antifranquista de Castroverde
