Axentes da Xefatura da Policía Autonómica de Lugo, en colaboración con axentes forestais do Distrito X Terra Chá, esclareceron un incendio forestal rexistrado o pasado mes de febreiro en Vilalba.

En concreto, os axentes tomaron declaración a un home como presunto autor dun incendio ocorrido o 23 de febreiro no lugar de Penaserra, en San Simón da Costa.

O lume produciuse cando o investigado estaba a realizar unha queima de matogueiras sen permisos e sen adoptar medidas preventivas. O escape das chamas queimou 0,08 hectáreas de superficie rasa.

As dilixencias foron remitidas ao Xulgado de Instrución en funcións de Garda de Vilalba. No que vai de ano, un total de 15 persoas foron investigadas pola Policía Autonómica como presuntas autoras de incendios forestais.