A Casa Sindical de Portomarín acolle este xoves (11.00 horas) un debate sobre os recortes que precarizaron o ensino no CEIP Virxe da Luz. Á cita están convidadas todas as persoas que desexen asistir, e acudirán parlamentarios de varias formacións políticas, das asociacións de nais e pais, e mailo alcalde Juan Serrano. Estará moderada polo xornalista Paco Nieto.
O debate desprazará a importantes representantes políticos, focalizando en Portomarín unha cuestión na que a vila lucense é paradigma. Trátase dun debate que destapou as contradicións do Partido Popular na Deputación, arredor dun colexio que pola falta de acordo quedou temporalmente sen actividades extraescolares e excursións, e no que os cativos reciben un terzo das horas de docencia obrigatorias noutros centros da provincia; desigual formación que compromete o futuro do alumnado e o dun Concello cun serio problema de despoboamento.
É por esta cuestión que o evento está considerado “de excesiva importancia” para o futuro do ensino e do rural. Estarán presentes un delegado das nais e pais dos alumnos do centro e o secretario da federación provincial de ANPA (Fapacel).
En canto á presenza dos partidos, está confirmada a asistencia da secretaria na mesa da Comisión de Educación do Parlamento de Galicia, a lucense Luca Chao, de En Marea; o vogal polo Partido Popular na Comisión, César Fernández; a homóloga Olalla Rodil, polo Bloque Nacionalista Galego e natural de Ribeira de Piquín; e o lucense Luís Manuel Álvarez polo Partido Socialista, tamén vogal no organismo parlamentar. A eles hai que engadir o alcalde de Portomarín, o popular Juan Serrano.
