EFE – Redacción | A conselleira de Infraestruturas, Ethel Vázquez, avanzou que a Xunta de Galicia traballa nun decreto para facilitar a comercialización da carne de xabaril, para incentivar a redución da poboación destes animais a través da caza.

Os departamentos de Sanidade e Medio Ambiente traballan nun decreto “que se atopa en período de consultas”, e que premia a caza con incentivos para a comercialización e o consumo de xabaril. Vázquez fixo este anuncio trala reunión da Comisión de Seguridade Vial, da que trascendeu que no 2018 aumentaron un 24 por cento os accidentes de tráfico relacionados con animais, a metade deles por mor do porco bravo.

“Hai un grupo de traballo que leva traballando moito tempo para concretar a forma de afrontar o problema, a través de diferentes medidas, coma batidas de caza ou repelentes olfativos”, apuntou Vázquez. A conselleira referiuse á redacción do decreto que favorecerá a comercialización da carne de xabaril tras constatar que os repelentes “non están tendo moito éxito”.

O Goberno pronunciarase acerca da caza con arco do xabaril no Senado