O portavoz do BNG no Concello de Lugo, Rubén Arroxo, anunciou que a súa formación acaba de solicitar a convocatoria dun pleno extraordinario no mes de agosto “para desbloquear” a situación económica do Concello, “con máis de 2,7 millóns en facturas bloqueadas con Candia”. Arroxo afirmou que, a pesar de que no mes de agosto non se adoita convocar o pleno municipal, “hai que arranxar o malestar que nos trasladan os autónomos e pequenos empresarios da cidade que continúan sen cobrar polos servizos prestados ao Concello”.
Rubén Arroxo explicou que Lugo está a vivir “unha situación inédita”, cun goberno municipal que “lle está negando, por decisión política, o pago a 542 autónomos e pequenos empresarios”. O portavoz do BNG dixo que o procedemento de pago dunha factura conta cunha primeira fase administrativa, na que se comproba a prestación dos traballos e tramítase a documentación correspondente. “Nesta parte pode haber atrasos por múltiples factores, tanto por causas da propia administración como por demora na presentación da factura”, indicou.
Unha vez terminado o trámite administrativo, comeza a fase política: “aquí é cando o goberno decide se leva as facturas a pleno no caso de superar o exercicio orzamentario ao que están imputadas, ou se, pola contra, decídese politicamente que non vaia a pleno”, dixo Rubén Arroxo. Arroxo denunciou que “hai centos de facturas que levan tres meses co trámite administrativo terminado, pero a señora Candia decidiu politicamente non levalas a pleno”. A consecuencia disto, engadiu, é ter os “542 provedores sen cobrar pola decisión da señora Candia de castigar os autónomos e pequenos empresarios de Lugo”.
Arroxo apostilou que, se non se convoca o pleno que reclama o BNG, “estas persoas non cobrarán ata o mes de outubro, xa que o próximo pleno está previsto para o 24 de setembro”. Isto suporía, dixo, “un atraso de cinco meses desde que os expedientes administrativos están terminados”.
