- Advertisement -
O presidente do Goberno, Pedro Sánchez, anunciou que Zaragoza será a sede da Axencia Estatal de Saúde Pública, en virtude do acordo alcanzado para iso na última reunión do Consello de Ministros neste período de sesións. Lugo era unha das aspirantes.
“Parabén aos zaragozanos e zaragozanas, e parabén tamén ao conxunto do país”, ofreceu o líder do Executivo durante a súa comparecencia para efectuar balance do curso político. “Fai falta ter unha Axencia Estatal de Saúde Pública que nos permita ter todos os recursos que non tivemos durante os primeiros meses aciagos da pandemia”, subliñou.
Toledo (Castela-A Mancha), Granada (Andalucía), Zaragoza (Aragón), Murcia, Barcelona (Cataluña), León (Castela e León), Oviedo (Asturias) e Lugo (Galicia) eran as oito cidades que aspiraban a acoller a sede deste organismo.
REACCIÓN DO PSOE LOCAL
O PSOE local de Lugo considera que a elección de Zaragoza como sede da Axencia Estatal de Saúde Pública “é unha decisión que debemos respectar, pero que recibimos con pesar porque Lugo presentaba unha candidatura sólida, solvente e con argumentos de peso”. Segundo os socialistas, a cidade contaba cunha proposta seria, con espazos dispoñibles e cunha realidade universitaria, sanitaria e científica que encaixaba plenamente coa natureza dunha institución destinada a reforzar a capacidade do Estado en materia de saúde pública.
Desde a dirección local socialista sinalan que “é importante facer unha valoración desde a serenidade e sen caer en localismos. Lugo competía cun grupo de cidades de primeiro nivel e o feito de chegar ata a fase final xa evidencia a fortaleza da candidatura”. Porén, senten que esta foi “unha cuestión positiva que debemos preservar: Lugo foi capaz de presentar unha candidatura de cidade, apoiada en activos propios e cunha visión que combinaba universidade, investigación, saúde pública e o enfoque de One Health, integrando a saúde humana, animal e ambiental”.
