O conselleiro de Sanidade, Antonio Gómez Caamaño, puxo de relevo este venres a «eficaz» coordinación entre a atención primaria e a hospitalaria na área sanitaria de Lugo, un modelo de traballo que está a permitir ofrecer unha resposta aos pacientes cardiolóxicos nun prazo máximo de dez días.
Durante a inauguración da III Reunión de CardioPrimaria (CYMAP 2026) no Hospital Universitario Lucus Augusti (HULA), Gómez Caamaño explicou que, desde o pasado ano, a área lucense conta cunha consulta clasificatoria de cardioloxía desde atención primaria. Este sistema, baseado en procesos de derivación acordados entre profesionais, permite que o Servizo de Cardioloxía do hospital realice unha valoración e dea resposta nunha marxe de entre 7 e 10 días.
O titular de Sanidade subliñou a importancia da rapidez na resolución de procesos e a necesidade de priorizar os distintos cadros clínicos para mellorar a asistencia. Neste contexto, destacou que o Sergas monitora actualmente a máis de 10.000 pacientes cardiovasculares desde os seus domicilios a través da plataforma de telemedicina Telea, o que facilita o seguimento constante sen necesidade de desprazamentos.
PROTOCOLOS E REFORMA DA PRIMARIA
Así mesmo, o conselleiro lembrou que Galicia conta cunha rede coordinada entre o 061 e os niveis asistencial e hospitalario para patoloxías «tempo-dependentes». Destacou a vixencia do Código Shock Cardiolóxico e o programa Progaliam, que establece protocolos de resposta áxil para situacións críticas como o infarto agudo de miocardio.
Finalmente, Gómez Caamaño avanzou que o seu departamento traballa cos sindicatos nunha reforma integral do primeiro nivel asistencial. O obxectivo desta iniciativa é reducir a carga burocrática dos profesionais e dotar de maior flexibilidade ás axendas médicas para optimizar a atención ao paciente.
