A sesión plenaria de xaneiro centrou gran parte do debate na situación da sanidade na provincia. Finalmente, o Partido Popular viuse na obriga de absterse na moción que insta á Xunta de Galicia a mellorar a Atención Primaria en Lugo, votación que prosperaría en calquera caso polo voto positivo do Partido Socialista (dez deputados), o Bloque Nacionalista Galego (dous) e do deputado non adscrito Manuel Martínez.
O secretario xeral dos socialistas lucenses, Álvaro Santos, radiografiou a precariedade crecente do servizo dende o primeiro mandato de Alberto Núñez Feijóo na Xunta de Galicia. Así, explicou que os centros de Atención Primaria contan con 23 médicos menos, dos cales 7 foron desbotados dende mediados de 2018. O deputado de Relacións Institucionais salientou tamén a eliminación de dous consultorios.
Santos explicou que foron trece os concellos afectados polos recortes, oito deles do centro da provincia (Begonte, Castroverde, Cospeito, Friol, Guitiriz, Navia de Suarna, A Pastoriza e Pedrafita do Cebreiro), un mariñán (Ourol), e catro da terra de Lemos (Monforte, Sarria, O Saviñao e Taboada). O representante socialista acusou aos populares de priorizar un criterio “aritmético e non asistencial”.
Dende o Partido Popular, Mari Teijeiro precisou que o cociente na provincia é dun facultativo por cada 1.275 habitantes, superior ao que mencionara Santos. A deputada conservadora gabou a sanidade galega por ser “un dos mellores modelos de España”, sendo a quinta comunidade autónoma “co maior gasto consolidado”. Aliás, xustificou a abstención na moción da Atención Primaria porque a formación “non ten complexos” e “quere que se mellore a sanidade”.
Polo Bloque Nacionalista Galego, Antonio Veiga lembrou os problemas no servizo de pediatría que afecta en especial grao aos municipios da Mariña. O representante da fronte nacionalista quixo tamén chamar a atención sobre a “alarma social” que xera a desidia coa Atención Primaria. Os deputados deste grupo portaban camisetas coa consigna Aquí, agora, sempre, salvemos a sanidade pública.
