A sección terceira da sala do contencioso-administrativo do Tribunal Superior de Xustiza de Galicia (TSXG) desestimou o recurso interposto por unha sociedade contra a Xunta de Galicia por inadmitir a súa solicitude de autorización para o parque eólico Medoutraves, situado no termo municipal da Fonsagrada (Lugo). O tribunal confirma así a legalidade da decisión do Goberno galego de frear o proxecto e as súas infraestruturas de evacuación.

A Xunta fundamentou a inadmisión en dúas resolucións: a primeira por situarse fóra das áreas de desenvolvemento eólico do plan sectorial e a segunda, e definitiva, porque as liñas eléctricas que interconectaban os aeroxeradores cruzaban un espazo protexido pola Rede Natura 2000. O TSXG aclara que a promotora non impugnou a primeira resolución, senón que presentou un novo proxecto que volveu ser inadmitido. A empresa alegaba que a Administración debía permitirlle emendar os defectos antes de rexeitar a solicitude, pero os maxistrados conclúen que a inadmisión era procedente ao non cumprir requisitos substantivos da lexislación vixente.

Na sentenza, a sala precisa que o motivo determinante para o rexeitamento do 29 de decembro de 2023 foi que as liñas eléctricas da poligonal cruzaban unha Zona de Especial Conservación. O tribunal sinala que, aínda que existían outros defectos que si serían emendables —como a falta de acreditación de capacidade económica ou técnica—, o feito de invadir un espazo natural protexido facía o proxecto inviable de orixe. Por tanto, os maxistrados sentencian que a Xunta actuou “de forma correcta”. A resolución non é firme, xa que a empresa aínda pode presentar un recurso de casación ante o Tribunal Supremo.