A circulación ferroviaria entre Monforte de Lemos e a parroquia de Laxosa, no concello do Corgo, atópase interrompida debido á rotura da catenaria en varios puntos da rede na provincia de Lugo. Segundo informou o Administrador de Infraestruturas Ferroviarias (Adif) a través da súa conta na rede social ‘X’, a fractura sería “intencionada”, aínda que polo momento non se especificaron as causas exactas nin os posibles autores dos danos. O incidente, que tivo lugar en torno ao mediodía deste sábado, agravouse por un posterior desprendemento de ménsula, afectando ao tramo que discorre entre Laxosa, A Pobra de San Xián e Sarria.

Como consecuencia desta incidencia técnica, Renfe viuse na obriga de establecer un plan alternativo de transporte por estrada entre Monforte e Lugo para garantir a mobilidade dos viaxeiros dos trens de Media Distancia. Adif detallou que o suceso afectou de forma directa á conexión entre estas localidades, mentres os equipos técnicos traballan para reparar os danos na infraestrutura eléctrica e restablecer a normalidade na liña canto antes.