O secretario xeral do PSdeG, José Ramón Gómez Besteiro, acusou o presidente da Xunta, Alfonso Rueda, de non mostrar a mesma “celeridade” coas comunidades enerxéticas que “aforran á xente na factura da luz” que a que ten co proxecto de Altri.
Tras visitar co alcalde de Xermade, Roberto García Pernas, a comunidade enerxética XERando, Besteiro denunciou que a súa instalación fotovoltaica, lista desde decembro de 2024, leva meses esperando pola autorización da Dirección Xeral de Minas da Xunta para poder producir electricidade e aforrar custos aos case 60 socios (particulares, pemes e administracións). Besteiro reclamou un apoio “decidido” e “maior axilidade e máis dilixencia” por parte do Goberno autonómico para proxectos que asenten poboación e desenvolvan o rural. O líder socialista resumiu a súa demanda en “máis atención ao rural, máis apoio aos proxectos que perseguen a transición enerxética e, en definitiva, facerlle a vida máis fácil á xente do rural”.
Ademais, Besteiro referiuse á situación límite do Servizo de Axuda no Fogar (SAF) nos pequenos municipios rurais. Denunciou que concellos como o de Xermade teñen que destinar o 25% do seu orzamento ao SAF, o que considerou unha proporción “escandalosa”. Censurou a “incoherencia máxima” do Goberno de Rueda, que “alega que o Estado lle debe 2.700 millóns para financiar a dependencia”, mentres el “nega servizos e financiamento” aos concellos, que teñen a obrigación legal de financialo.
