Os concursos públicos impulsados pola Xunta para dereitos mineiros caducados nas provincias de Pontevedra e Lugo quedaron desertos, segundo resolucións publicadas no Diario Oficial de Galicia (DOG). Os terreos non adxudicados nestas provincias serán rexistrables e poderán ser solicitados pasados oito días da súa publicación no BOE.

O voceiro de Ecoloxistas en Acción, Cristóbal López, sinalou que o feito de que os concursos quedasen desertos en Pontevedra e Lugo non se compadece coa idea de que “é a Xunta a que impulsa a Galicia como unha gran mina”. López augura que “Ourense vai ser a provincia sacrificio”, dado que tamén se publicaron as resolucións dos concursos para Ourense e A Coruña.

Na Coruña, a Xunta admitiu a trámite solicitudes de permisos de investigación de Caolines de Vimianzo, S.A., Epifanio Campo, S.L. e Refractarios Campo, S.L. No caso de Ourense, admitíronse permisos de Áridos Técnicos, S.A. e Canteiras Ávila, S.L., aínda que declarou desertos “todos os demais dereitos” citados no concurso, que abranguían varios concellos.

A conselleira de Industria, María Jesús Lorenzana, informara a finais de outubro dun total de 20 solicitudes que saíron adiante no primeiro concurso aprobado en 14 anos: 18 na Coruña (cerámica) e 2 en Ourense. O seu departamento traballa xa para convocar un segundo concurso previsiblemente en xaneiro de 2026. Lorenzana destacou que os dereitos non adxudicados manteñen un valor, xa que as súas cuadrículas poden ser solicitadas por calquera promotor en calquera momento.