Unha persoa faleceu na mañá deste venres en Lugo tras producirse unha colisión frontal entre dous coches e un camión na parroquia de Orbazai. Segundo informa o 112 Galicia, foi sobre as 08.10 horas cando un particular avisou dun accidente entre dous coches á altura do quilómetro 1 da N-540. Máis tarde, a Garda Civil confirmou que tamén había un camión implicado.

O primeiro alertante xa indicaba que o suceso parecía grave e que podería haber persoas atrapadas nos vehículos, polo que se informou a Urxencias Sanitarias de Galicia-061, á Garda Civil, aos bombeiros e á Policía Local de Lugo. Con todo, os profesionais sanitarios só puideron confirmar a morte do condutor dun dos coches. Pola súa banda, outras dúas persoas foron evacuadas en ambulancia ao Hospital Lucus Augusti.