O Goberno galego e o Concello de Lugo desbloquearon a reforma da rúa Serra de Meira, unha actuación enmarcada no Plan Paradai, cun investimento de 937.000 euros. A conselleira de Vivenda e Infraestruturas, María Martínez Allegue, e o director da Axencia Galega de Infraestruturas, Francisco Menéndez, mantiveron este martes unha reunión de traballo co alcalde de Lugo, Miguel Fernández, e o concelleiro de Urbanismo, Jorge Bustos, para avanzar no proxecto de mellora desta vía.
Durante o encontro, a conselleira trasladou ao rexedor o “compromiso firme” da Xunta con esta intervención e presentou a proposta de convenio para a súa execución, que contempla un investimento superior a 937.000 euros. Allegue confirmou ademais que o proxecto de execución está practicamente listo para a súa presentación oficial ao Concello, e que o Goberno autonómico asumirá o 100% do financiamento.
O proxecto prevé a mellora e ampliación da rúa Serra de Meira no tramo comprendido entre as glorietas de Serra de Meira e da avenida Adolfo Suárez. As obras incluirán a pavimentación da calzada, a execución de novas beirarrúas, a renovación das sendas peonís e zonas axardinadas, a instalación de mobiliario urbano e a actualización dos servizos municipais.
Tamén se contempla a reposición e mellora das redes de saneamento -con separación de augas pluviais e residuais-, abastecemento de auga, telefonía, electricidade e iluminación pública, así como a renovación da sinalización vertical e horizontal. O alcalde de Lugo cualificou a reunión como “moi produtiva” e destacou que, tras moitos anos de espera, “por fin dáse un paso importante nun proxecto moi necesario para a cidade, especialmente para os barrios do leste, que levan tempo reclamando esta actuación”.
“O obxectivo é mellorar unha das principais vías de conexión da zona este e ofrecer aos veciños unha infraestrutura moderna, segura e acorde co que Lugo merece”, afirmou o rexedor, quen lembrou que tanto o Concello como a Confederación Hidrográfica “cumpriron o seu parte” e agora “é a quenda da Xunta”.
