O Concello de Lugo revisará o próximo ano os protocolos de seguridade do desfile gandeiro do día de San Froilán para evitar que se volvan a producir incidentes como o acontecido nesta edición, na que unha vaca arroiou a unha viandante durante unha fuxida descontrolada.
Así o comunicou este martes o Goberno local durante a xunta de portavoces celebrada coa participación do alcalde, Miguel Fernández, o tenente de alcalde, Rubén Arroxo, e representantes dos distintos grupos políticos da corporación municipal. O goberno local explicou que a Policía Local está a elaborar aínda un atestado sobre o incidente e lamentou o estado da persoa ferida, “que continúa hospitalizada, aínda que xa se atopa estabilizada”. Durante a xunta, o executivo municipal informou á oposición sobre o traballo previo realizado para a organización do desfile.
Así, lembrou que antes do inicio das festas, o pasado 29 de setembro, celebrouse unha Xunta Local de Seguridade na que participaron todos os corpos policiais -Policía Local, Policía Nacional e Garda Civil-, ademais de Protección Civil, bombeiros e representantes do Goberno municipal. “No devandito encontro coordináronse os operativos necesarios para garantir o desenvolvemento seguro das máis de 200 actividades programadas con motivo do San Froilán“, dixo. Posteriormente, o xoves 2 de outubro, representantes do Pazo de Feiras e Congresos de Lugo reuníronse coa Policía Local para abordar cuestións específicas relacionadas coa seguridade do desfile.
O goberno local insistiu en que durante o evento contouse coa presenza de efectivos da Policía Local, Policía Nacional e seguridade privada contratada polo Pazo de Feiras e Congresos, entidade organizadora do acto. Así mesmo, diversas asociacións colaboraron achegando veterinarios encargados de velar polo benestar animal. Arroxo incidiu en que o Desfile de Gando, que se celebra desde hai 18 anos, “lembra a orixe feiral das festas do San Froilán e constitúe unha das súas tradicións máis emblemáticas”.
