A Policía Nacional detivo en Lugo a un home de 64 anos de idade por, supostamente, intimidar cunha navalla a dous menores que xogaban na vía pública e desobedecer aos axentes.
Os feitos ocorreron na tarde do luns na zona de Fonte dos Ranchos, cando o individuo, un home ‘sen teito’ que adoita deambular polo barrio, achegouse a dous nenos e, presuntamente, sacou de entre as súas roupas unha arma branca coa que lles ameazou.
Os menores, duns doce anos, lograron escapar correndo e refuxiáronse nun comercio próximo, onde relataron o sucedido ao propietario. Foi este quen deu a voz de alarma á Policía.
Os raparigos, visiblemente asustados, relataron os feitos aos axentes que se desprazaron ao lugar para despregar o operativo de procura polos barrios próximos. O sospeitoso foi localizado pouco despois camiñando por unha beirarrúa en Camiño Real e resistiuse á detención, polo que tiveron que sometelo pola forza.
Posteriormente, foi trasladado a dependencias policiais, onde pasou a noite nos calabozos da comisaría da rúa Chantada, por desobediencia. O detido é unha persoa habitual na contorna, e noutras ocasións xa protagonizara episodios conflitivos.
