Unha persoa sufriu queimaduras e necesitou asistencia sanitaria nun incendio rexistrado nun alpendre na Pastoriza. Segundo informa a Axencia Galega de Emerxencias (Axega), o suceso ocorreu minutos antes das 13.00 deste luns 18, cando un particular chamou ao 112 Galicia para alertar do sucedido.

O parte oficial indica que o alertante avisou tras observar unha gran cantidade de fume no lugar de Cordeiro, na parroquia de Álvare. O 112 mobilizou aos equipos de Urxencias Sanitarias de Galicia-061, aos bombeiros de Vilalba, ao GES da Pontenova e a axentes da Garda Civil.

No interior das instalacións onde se atopaba a vítima había herba seca acumulada e un vehículo agrícola. Os equipos de emerxencia confirmaron que só ardía o alpendre, e sobre as 13.00 horas continuaban traballando para extinguir o lume.

ARDE UN SOTO EN CHANTADA

Outro incendio rexistrouse sobre as 11.30 horas no soto dunha vivenda situada en Vilanova do Monte, na parroquia de San Salvador de Asma, en Chantada. No interior había materiais e electrodomésticos que, segundo o servizo de emerxencias, arderon por completo.

Os bombeiros tiveron que refrigerar varias bombonas almacenadas na estancia. No operativo participaron os bombeiros e a Policía Local de Chantada, ademais de axentes da Garda Civil.