A Xunta de Galicia, a través da Consellería de Medio Ambiente e Cambio Climático, modificou a listaxe de tecores onde está permitida a solta do faisán. Desta forma, engadiu o tecor A Ulloa, na provincia de Lugo, co que o total de lugares aumenta ata os 184. Esta resolución entra en vigor este venres, un día despois da súa publicación no Diario Oficial de Galicia (DOG). Con iso, modifica outra de 2017, que incluía unha primeira relación de tecores e explotacións cinexéticas comerciais nas que se permite a solta desta especie. Desde a publicación da anterior resolución, a Xunta recompilou información que permite constatar a existencia de soltas de faisán con anterioridade á entrada en vigor da respectiva lei, do 2007. Por este motivo, a Dirección Xeral de Patrimonio Natural engadiu este novo tecor á listaxe.