A Policía Local de Lugo detivo o domingo e o luns a dous homes por senllos episodios de violencia machista, tras supostamente agredir á súa parella e exparella, respectivamente. O primeiro caso ocorreu na madrugada do domingo, 29 de xuño. O Grupo Operativo Nocturno do corpo municipal foi comisionado pola sala do 092 para que acudise a unha rúa do centro histórico na que unha parella discutía no interior dun coche.
Ao acudir alí, os axentes localizaron o vehículo e dentro había unha muller “moi alterada e nerviosa”, que relatou os feitos aos axentes. Minutos despois, conseguiron localizar e identificar o home, que recoñeceu o feitos pero dixo que non a agrediu en ningún momento. Así, a Policía procedeu a detelo por un presunto delito de violencia de xénero, tras o que foi trasladado a comisaría para a instrución de dilixencias para o xulgado correspondente.
O segundo episodio ocorreu na tarde do 30 de xuño, cando unha patrulla da Policía Local foi requirida para acudir a un edificio do norte da cidade despois de que unha muller solicitase axuda porque a súa exparella mostraba un comportamento agresivo e non quería abandonar o domicilio.
Os actuantes entrevistáronse coa muller na vivenda, onde estaba tamén a súa filla menor de idade. Unha vez obtida unha descrición do presunto agresor, iniciouse un dispositivo para atopalo.
Unha vez localizado e identificado, os axentes procederon á súa detención por un delito de violencia de xénero, tras o que foi trasladado a dependencias policiais para instruír as dilixencias para o xulgado.
