Unha persoa foi detida e outras 31 identificadas no marco dun dispositivo de inspección en locais de lecer en Lugo, a cargo de axentes da Policía Local e a Nacional. Foi na madrugada do domingo, día 29, cun control e inspección de diferentes locais de lecer, situados un deles na rúa Tui, outro no barrio da Milagrosa e outro na zona de Recatelo.
Por infracción á normativa de espectáculos públicos e actividades recreativas, en cuestións como carteis sobre prohibición de alcol a menores, carencia de licenza ou falta de documentación, levantáronse diversas actas. Tamén dúas por infracción á Lei de Seguridade Cidadá. No caso da detención, produciuse por un delito de atentado a axentes da autoridade, sendo trasladada a persoa a dependencias da Comisaría da Policía Nacional.
Noutra orde de cousas, o día 30, por desobediencia a axentes da Policía Local, denunciouse a dúas persoas sentadas nun banco do parque infantil do Sacro Corazón por estar nunha zona valada entorpecendo os traballos que había e por negarse a abandonar o lugar.
