Axentes da Policía Local de Lugo detiveron nas últimas horas a un home, investigado por un suposto delito de ameazas graves, tras esgrimir unha arma branca ante varios menores.
Segundo informaron fontes policiais, os feitos ocorreron na Avenida de Madrid, onde acudiron dotacións do 092 tras ser alertadas da presenza dun home que estaba a ameazar cun coitelo a varios menores.
Os axentes lograron localizar ao sospeitoso, que escondía o coitelo baixo a súa chaqueta e que, ao decatarse da presenza dos policías, tratou de desfacerse del. O coitelo, de 22 centímetros, foi recuperado polos funcionarios, que se entrevistaron cos menores. Os mozos relatáronlles que foran ameazados polo sospeitoso e achegaron vídeos con gravacións do sucedido. O detido foi posto a disposición xudicial.
