Axentes da Policía Local de Lugo denunciaron a un condutor que circulaba sen carné e que, ao ser identificado, achegou os datos do seu irmán xemelgo. Os feitos ocorreron a pasada semana cando unha patrulla detectou un turismo que tentou fuxir ao decatarse da presenza policial na rúa Nicomedes Pastor Díaz.
O vehículo foi finalmente interceptado na Ronda das Fontiñas e o condutor identificouse os datos do seu irmán xemelgo. Ao facer as comprobacións, os axentes constataron que o coche carecía do seguro obrigatorio, polo que foi trasladado ao depósito municipal.
O condutor foi identificado de forma correcta posteriormente e así se puido comprobar que carecía de permiso de conducir, por non obtelo nunca. Por todo iso, foi denunciado por un suposto delito contra a seguridade viaria. Por outra banda, a Policía Local informou tamén dunha intervención na rúa San Roque, onde foi detectado un vehículo con placas estranxeiras mal estacionado. Os funcionarios comprobaron que o coche, aínda que levaba matrícula de Romanía, seguía dado de alta con placas nacionais e carecía tanto de seguro como da obrigatoria ITV. Así, tramitáronse dilixencias por un posible delito de falsidade documental.
