A portavoz do PSOE no goberno local de Lugo, Ana González Abelleira, volveu a referirse este mércores á celebración do Consello da Xunta na cidade o pasado luns, para reiterar a “decepción” do Concello polos anuncios do presidente Rueda. “Se noutras cidades estes Consellos veñen coa carteira chea, nesta ocasión para Lugo foi un trato decepcionante porque non anunciaron nada novo”, dixo.
González Abelleira referiuse a a anterior reunión celebrada en Lugo en 2022, “cando se comprometeron ata 4,5 millóns de euros e, de todo aquilo, só viu a luz o aparcadoiro, que aínda non está operativo, de Avenida de Breogán”. Neste contexto, reclamou investimentos en actuacións “ás que non se está dando resposta”, pondo como exemplo o centro de saúde do Sacro Corazón, do que asegurou que “non responderon o proxecto presentado” polo Concello.
Tamén acusou “ausencias clamorosas” nas previsións, como o Museo da Romanización, a recuperación do barrio da Tinería, a conexión das Gándaras coa A-6 ou o remate do corredor Nadela-Sarria. Lembrou a portavoz que o alcalde, Miguel Fernández, solicitou unha reunión co presidente da Xunta, Alfonso Rueda, para tratar dos proxectos pendentes, “debido á falta deles nos seus plans”.
CRÍTICAS DE RUBÉN ARROXO
Sobre o barrio da Tinería, o tenente de alcalde, Rubén Arroxo, do BNG, sumouse ás críticas: “Nin sequera anunciaron que van acabar de arranxar as casas que son propiedade da Xunta e que xa teñen as lonas desteñidas e cáense a cachos”.
Tamén se referiron ambos os portavoces do bipartido ao aparcadoiro de Fontiñas. A socialista asegurou que non atenderon ás propostas que presentou o Concello, que ofreceu outras dúas parcelas, así como a ampliación da avenida Vilaverde. Arroxo, pola súa banda, criticou a decisión de facer un aparcadoiro na Avenida Breogán, “onde hai sitios para aparcar sen problema” cando en zonas como Fontiñas hai “moitos problemas, do mesmo xeito que noutras zonas”.
González Abelleira tamén tachou de “insuficiente” o anuncio de construír vivenda pública en forma de aloxamentos compartidos, asegurando que “os problemas en Lugo son estruturais e levamos 15 anos sen ter vivenda pública construída por quen lle compete, que é a Xunta de Galicia”.
