A Policía Local de Lugo conseguiu recuperar un teléfono móbil subtraído e que en poder dun home que o acababa de comprar por 5 euros, segundo informaron fontes policiais.

Os feitos ocorreron o pasado fin de semana, cando unha dotación policial foi alertada pola parella da propietaria do teléfono. Grazas a unha rápida intervención, localizouse o terminal en poder dun home que relatou que o acababa de comprar por 5 euros a outro individuo na estación de autobuses.

O ‘comprador’ acompañou aos policías á terminal e identificou á persoa que lle vendeu o teléfono. Este explicou que atopou o terminal e que, en lugar de entregalo en obxectos perdidos ou tentar localizar ao seu dono, decidira vendelo.

A Policía Local alertou de que este tipo de condutas, como apropiarse dun obxecto perdido e non devolvelo, poden constituír delitos de apropiación indebida ou receptación, tipificados no Código Penal.

Por outra banda, a Policía Local de Lugo tamén interveu nun piso tras recibir numerosos avisos e queixas de veciños polo ruído. Así, a música que saía da vivenda podía escoitarse na vía pública, e a inquilina do inmoble mantivo unha actitude desafiante en todo momento, negándose a ser identificada e restablecendo o volume da música a pesar das advertencias.

Debido a iso, os axentes tramitaron denuncia por desobediencia e por infracción da ordenanza de protección ambiental, debido ás molestias ocasionadas polo ruído.