Unha liorta nun local de lecer do barrio histórico de Lugo saldouse con dúas persoas detidas e varias feridas, entre elas os dous arrestados, segundo informaron fontes policiais.
Os feitos ocorreron na madrugada do sábado ao domingo, cando un home entrou no establecemento e o propietario afeoulle a súa presenza, xa que estivera implicado en pelexas anteriormente e exhibira navallas no local. Así, iniciouse unha discusión e o home sacou unha arma branca, ameazando ao dono do establecemento. Cando outro cliente se achegou para tratar de mediar, iniciouse unha disputa na que os tres resultaron feridos. Igualmente, resultou con lesións a parella do dono do pub.
Cando a Policía chegou ao establecemento, o cliente que iniciara a liorta e sacara a navalla xa non se atopaba alí, pero foi localizado posteriormente con feridas graves, polo que foi trasladado ao HULA en ambulancia. O 061 confirmou que se trata dun home de 23 anos, S.P.R., evacuado nunha ambulancia de soporte vital básico. A Policía acabou detendo a este mozo, así como ao dono do local que, segundo testemuñas, logrou arrebatarlle o coitelo e atacoulle con el.
