Miguel Fernández converteuse este martes no novo alcalde de Lugo, o terceiro en dous anos, durante o pleno extraordinario no que tamén entrou a formar parte do novo Goberno Waldir Sinisterra Restrepo. O que xa é novo mandatario da cidade estivo acompañado de familiares, amigos, traballadores do Concello e compañeiros de partido, entre un numeroso público.
Tal e como se esperaba despois do acordo alcanzado a pasada semana entre os concelleiros do grupo municipal, Fernández logrou o apoio dos outros sete concelleiros do seu partido e tamén do cinco nacionalistas, socios de Goberno desde o inicio desta lexislatura. Pola súa banda, os 12 concelleiros do PP rexeitaron presentar candidato como mostra de respecto á situación e votaron en branco.
Miguel Fernández aceptou o bastón de mando de mans de nacionalista Rubén Arroxo, alcalde accidental da cidade desde o pasado 1 de marzo. A toma de posesión volveu a ser un acto multitudinario, como o foi a anterior, en 2024, cando Paula Alvarellos recibiu o bastón de mando de mans de Lara Méndez. Non faltaron as referencias á alcaldesa falecida, tanto por non poder ser ela a que entregou o bastón como polo recente e súbito de óbito.
Entre as personalidades asistentes estiveron o delegado do Goberno, Pedro Branco, e o presidente da Deputación Provincial, José Tomé.
RECORDO A PAULA ALVARELLOS
Miguel Fernández aceptou o bastón de mando de mans do nacionalista Rubén Arroxo, alcalde accidental da cidade desde o pasado 1 de marzo, tras a votación, e nas súas primeiras palabras como mandatario tivo un recordo especial para Paula Alvarellos, lembrando o “sinal que deixou na cidade en tan pouco tempo”. Agradeceu “o legado” que deixa e subliñou un “compromiso firme” de traballar pola cidade.
As primeiras citas de agradecemento do novo alcalde foron para todos os compañeiros de corporación, en especial para os do Partido Popular, “que estiveron sempre connosco e que compartiron a nosa dor, así como agora votaron desta forma tan respectuosa”. Tamén lembrou Fernández a súa chegada á política municipal, da man de José López Orozco, e o seu paso polo Goberno de Lara Méndez “que confiou en min e deume máis responsabilidade”. Así mesmo, tivo palabras de afecto para Gómez Besteiro e José Tomei “polo seu agarimo e trato amable”, facendo especial fincapé nos seus compañeiros no equipo de goberno, “un grupo unido e comprometido” aos que agradeceu o seu apoio.
Miguel Fernández comprometeuse a facer seus os proxectos xa encamiñados “nun firme compromiso de traballar pola cidade” co obxectivo de continuidade aos plans de Alvarellos. Asegurou que o seu mandato se caracterizará por manter un carácter “dialogante, moderado e conciliador, en busca sempre do consenso”.
As primeiras promesas de face aos cidadáns son o final “o máis axiña posible” das obras no centro da cidade, a modernización dos barrios e as parroquias e construír un rural competitivo e innovador, sen deixar de lado os servizos sociais, a educación e a sanidade, “reclamando ás administracións, sexan da cor que sexan, que cumpran con Lugo, pero sempre fóra da crispación”.
Tamén abriu as portas ao diálogo a veciños, asociacións e colectivos “para avanzar na integración de todos e que Lugo sexa un lugar de oportunidades e unha cidade máis xusta”. Para concluír a súa primeira intervención como alcalde, compartiu unha cita do xornalista Herber Caen: “Unha cidade non se mide pola súa lonxitude e anchura, senón pola amplitude da súa visión e altura de soños. Convídovos a todos a soñar cun Lugo mellor”.
NOVO GOBERNO
Xunto ao seu novo cargo, o novo alcalde asinou tamén o primeiro decreto de organización, que xa anunciou que será “transitorio” para que se poida comezar a traballar de novo desde o propio mércores, cando está prevista a súa primeira Xunta de Goberno Local. Neste primeiro momento, Fernández continúa coa repartición de responsabilidades herdado do Goberno de Alvarellos, mantendo el mesma a área de Medio Ambiente, que era a que xestionaba, ademais das funcións de alcalde.
Miguel Fernández deberá deseñar en breve unha nova repartición de áreas, así como tomar decisións sobre o persoal de confianza e grupo de asesores, xa que estes son nomeados e escollidos por cada alcalde e cesan cando o fai o mandatario.
