Un veciño de Lugo aceptou unha pena de seis meses de prisión e pagar unha indemnización de 2.000 euros a un camareiro ao que proferiu insultos racistas e homófobos nunha cafetaría da rúa Camiño Real. Chamouno “panchito de merda” e díxolle que parecía “gai” por usar luvas para porlle unha cana que, segundo dixo, íalle “a dar SIDA”.
O home, xulgado este martes na Audiencia Provincial e para o que se pedían nun principio 15 meses, chegou a un acordo coa Fiscalía para rebaixar a condena. Ao non ter antecedentes, a pena foi suspendida polo tribunal no mesmo acto, coa condición de que non volva delinquir en dous anos e indemnice á vítima.
Os feitos xulgados remóntanse a novembro de 2023, cando o agora condenado acudiu ao local onde o camareiro, de nacionalidade brasileira, serviulle utilizando unhas luvas. O home encarouse co camareiro, ao que lle recriminou que lle servise desta maneira. Frases como “panchito de merda”, “pallaso”, “os inmigrantes non valedes para nada”, “pareces gai por pór a caña con luvas” e “a caña que me puxeches vaime a dar SIDA e vai facer que me volva gai” foron algunhas das expresións que lle gritou ao traballador. Por estes feitos foi acusado dun delito de odio e outro leve de ameazas.
O acusado aceptou, por tanto, o seis meses de prisión, unha multa de ao redor de 1.000 euros e inhabilitación de tres anos para exercer no campo docente, deportivo e de tempo libre durante tres anos polo primeiro delito. Polo de ameazas súmanse 90 euros de multa e, ademais, deberá pagar unha indemnización doutros 1.000.
