Axentes da Policía Local de Lugo detiveron a un veciño da cidade como presunto autor dun delito de violencia de xénero, tras tentar supostamente agredir á súa muller. Segundo informaron fontes policiais, a intervención produciuse na madrugada do pasado venres, cando o 092 recibiu unha chamada dunha muller que relataba que se atopaba pechada nun cuarto da súa vivenda, porque lle tiña medo ao seu marido.
Tal e como relatou a muller, a súa parella tentara agredila, en presenza dun menor de 10 anos, polo que os axentes procederon á súa detención. Por outra banda, a Policía Local tamén informou da detención doutro individuo, neste caso, por vulnerar unha orde de afastamento que lle impedía estar na cidade de Lugo.
O home foi localizado nun banco da rúa Lamas de Prado e foi identificado por axentes da Policía Local, que comprobaron que tiña en vigor esa medida, que lle impide entrar na cidade.
