Axentes da Policía Local de Lugo interviñeron o pasado mércores para evitar que un menor se lanzase desde o adarve da Muralla, segundo informaron fontes policiais. Así, durante a mañá do mércores o 092 recibiu un aviso para acudir á Muralla, porque unha persoa parecía ter intención de suicidarse. Unha dotación dirixiuse de inmediato á zona e, durante o traxecto, contactou co número de teléfono facilitado, que resultou ser da persoa que se atopaba no alto da Muralla, un menor que trasladaba a súa intención de lanzarse ao baleiro.

Os axentes estableceron conversación con el, tentando acougalo ata a súa chegada, que se produciu en poucos minutos. Ao chegar, os policías atopáronse ao mozo no adarve da Muralla e fixéronse cargo del, contactando cos proxenitores. Os pais acudiron de inmediato e acompañaron ao menor a un centro hospitalario, onde foi trasladado en ambulancia. En principio e, aparentemente, segundo informou a Policía, o menor non presentaba ningunha lesión.

Por outra banda, a Policía Local de Lugo informou tamén dun roubo con forza cometido no almacén dunha empresa na noite do pasado mércores ao xoves. Trátase dun local que, segundo testemuñas, tiña unha porta cara a rúa Sil.