A Asociación Raiolas inaugurou este sábado en Lugo, nun acto cunha ampla representación institucional, o primeiro centro de día da cidade dedicado a persoas con trastornos do espectro autista (TEA) e con trastornos de comunicación social, así como ás súas familias. Leva meses en funcionamento e dispón dun total de 15 prazas.
Ao evento asistiron, ademais da presidenta de Raiolas, Inés Flores, a conselleira de Política Social e Igualdade, Fabiola García; a alcaldesa de Lugo, Paula Alvarellos; o responsable de Formación, Ensino e Economía do Coñecemento da Deputación, Miguel Fernández; e a vicepresidenta primeira do Parlamento galego, Elena Candia, entre outros.
Este centro abriu nun local cedido pola Deputación que era a antiga gardaría do campus universitario. Ademais, a institución provincial investiu uns 112.000 euros nas obras de acondicionamento.
