O presidente da Deputación de Lugo, José Tomé Roca, e o secretario xeral da Confederación de Empresarios de Lugo (CEL), Jaime López Vázquez, asinaron un convenio de colaboración que contempla unha achega económica de 40.000 euros á entidade.
Segundo informou a institución provincial, a contía servirá para facer fronte aos gastos de funcionamento da CEL e garantir a continuidade das súas actividades en apoio ás empresas da provincia. “A CEL desempeña un papel crucial na promoción das empresas da provincia. Esta achega permitirá á entidade continuar co seu labor de apoio aos empresarios e de fomento da creación de emprego”, afirmou José Tomé.
Desta forma, remarcou que esta colaboración é “un exemplo do compromiso” da institución provincial co “fortalecemento” do tecido empresarial da provincia e o “impulso” de sectores como o agrogandeiro, o comercio, a hostalaría, o turismo e a industria.
