A Policía Nacional detivo a tres homes en Lugo acusados dun delito de tráfico de drogas tras intervirlles máis de 300 dose de sustancias estupefacientes e diñeiro en metálico. Tal e como informou a Policía, os feitos sucederon nos barrios de Paradai e de Feijoo, na capital lucense.
Unha vez que os axentes coñeceron a actividade ilícita do principal implicado, iniciaron unha investigación para concretar o modus operandi na distribución e as zonas de influencia. Deste xeito, comprobaron que se trataba dun grupo criminal no que un deles transportaba a droga a Lugo para ser distribuída e vendida polos outros dous detidos. O traslado da mercadoría realizábase nun vehículo e a súa custodia e venda nun domicilio diferente ao que empregaba para a súa vida diaria.
Así, froito destas detencións e dos posteriores rexistros domiciliarios, a Policía interveu diferentes útiles para a manipulación das sustancias estupefacientes, así como unhas 300 doses de cocaína, haxix e heroína, ademais dunha importante cantidade de diñeiro en metálico.
